Sistema Eragilea

Sistema Eragilea plataforma bat da, artistei beren argitalpenak deskribatzeko eta sarean katalogatzeko aukera ematen diena. Sistema Eragilearen datu-baseak erabiltzaileek sorturiko erregistroak biltzen ditu, eta beste funts bibliografiko batzuetan katalogaturik dauden argitalpen-erregistroak ere bereganatu nahi ditu.

Zergatik Sistema Eragilea?

Argitalpenak desafio formalak dira artistontzat, gustu handiz onartzen ditugun erronkak. Erakusketen zama arintzen dute, eta estudio-lana agertoki berrietara eramaten. Argitalpenen luze-zabalean, beste batzuen ikuspegiez osatzen ditugu gure lanak. Beste pertsona batzuei idatzizko ekarpenak eskatuz prozesu hauek osatzean, gure testuak edo beste batzuenak itzuli eta argitalpenetan txertatzean... editore-rola gehitzen diegu gure zeregin plastikoei. Materialetan arreta jartzean, materialak tolestu eta moztean, inprimatze-modu tradizionalak behartzean edota existitzen direnetan sakontzean... esperimentazio-eremu berriak aurkitzen ditugu.

Euskal testuinguruan argitaraturiko artista-argitalpenen ehuneko handi bat finantzaketa publikoari esker ekoizten da. Azpimarratzekoa da xede honetara bideraturiko kontu-sailak gero eta espezifikoagoak direla, eta aurrekontuak gero eta handiagoak. Hala eta guztiz ere, gehienetan, argitalpenon banaketa eta zabalkundea bigarren maila batean geratzen dira. Antzeko zerbait gertatzen da beste iturri batzuek finantzaturiko argitalpenekin. Argitaratze-lana praktika artistikoaren alderdi garrantzitsua bada ere, ez dago artista-argitalpenak bildumatzea, aztertzea eta publikoaren esku jartzea ardatz dituen testuinguru edo proiekturik. Liburu-denda edo liburutegietan topa daiteke noizbehinka erakusgarri solteren bat edo beste, baina gehienetan ez dira munta handikoak izaten, ez eskalaz, ez konplexutasunez.

Sistema Eragilearen helburua, hain zuzen, egoera honi aurre egitea da, eta argitalpenen banaketa eta trukea bultzatuko dituen tresna bat sortzea. Sistema Eragileak katalogo batean bildu nahi ditu euskal testuinguruan ekoizten diren artista-argitalpenak; datu-base bat eraiki nahi du, baliagarri gertatuko zaiena komisarioei, historialariei, ikasleei, irakurleei, ekintzaileei... eta aldi berean artistei beren argitaratze-bitartekoetan sakontzen lagunduko diena.

Zer da Sistema Eragilea?

Sistema Eragilea tresna bat da, euskal testuinguruko artista-argitalpenen aniztasuna aztertzeko aukera ematen duen lanabes bat. Esparru artistiko horretako argitaratze-ekoizpena kartografiatzeko balio du, beraz.

Sistema Eragileak, era berean, artista-argitalpenak zabaltzen eta banatzen laguntzen du, erabiltzaileen esku jarriz haien ezaugarriak, eskuragarritasuna eta prezioa, eta argitalpenen ekoizleekin harremanetan jartzeko bide zuzena eskainiz.

Argitalpen bakoitzarekin loturiko funts dokumentala handiagotzeko aukera ere eskaintzen du Sistema Eragileak. Izan ere, erabiltzaileen esku jarritako gordailu bati esker, erreferentzia bakoitzarekin loturiko material osagarriak gehitu edo kontsultatu daitezke.

Sistema Eragileak material inprimatua katalogatzen du. Alde batera uzten ditu ilustraziora, entretenimendura edo arlo komertzialera bideraturiko argitalpenak. Argitalpenak ulertzeko dugun moduan, argitaratze-jarduera lan plastikoarekin nahasten da. Sistema Eragileak helburu esperimentala duten argitalpenak lehenesten ditu.

Sistema Eragilea -zko argitaletxeak sorturiko eta Tractora Koop E. kooperatibak babesturiko tresna bat da.